DCCLXXI
Rémission accordée à Pierre Baron qui, à la sollicitation de Géheudin et de Sebran Chabot, avait produit de faux témoins en faveur de ceux-ci, dans leur procès contre Guillaume Crespin, Jean Cresson et Pierre Herbert, puis s'était évadé des prisons de Vouvant, à condition qu'il y restera emprisonné pendant deux mois.
- B AN JJ. 143, n° 258, fol. 135
- a P. Guérin, Archives historiques du Poitou, 24, p. 85-87
Charles, etc. Savoir faisons à touz, presens et avenir, de la partie de Pierre Baron,
povre jeune homme, nous avoir esté exposé que comme, à la requeste, promotion et par
la grant oppression de Guehedin Chabot, chevalier, et de Sambrant Chabot,
escuier1, freres, le dit exposant eust simplement pour yceulx freres produit
certaines personnes pour porter tesmoingnage par devant Pierre Maynart2, soy disant nostre sergent et
commissaire en ceste partie, sur certaine [p. 86] information par luy faicte de et
sur certains cas et choses touchans les diz freres, d'une part, et Guillaume Crespin,
Jehan Cresson et Pierre Herbert, d'autre part ; les quelles personnes, par
l'ennortement et introduction d'iceulx freres aient déposé contre vérité et aussi
contre les diz Crespin, Cresson et Herbert, au proffit des diz freres, combien que
ledit exposant deist aux diz tesmoings à la dicte production qu'ilz ne déposassent ou
deissent fors que la vérité, par devant le dit commissaire. Pour lequel fait ycellui
exposant qui de ce s'entremist contre sa voulenté et sanz ce qu'il en ait pour ce
aucunement amendé, eust esté prins et mis ès prisons de Vovant, qui est au sire de
Partenay, des queles il, doubtant rigueur de justice, s'est parti et absenté du
pays, où il n'oseroit jamais retourner ne converser, se de lui ne avions pitié et
compassion. Suppliant humblement que, ce consideré et que aucuns des diz tesmoins ont de
ce esté puniz, et aussi que le dit suppliant ne fu onques actaint ou convaincu d'autre
villain cas, nous sur ce lui vueillons extendre nostre grace. Et nous, voulans
misericorde preferer à rigueur de justice, avons au dit Pierre Baron ou cas dessus dit
quictié, remis et pardonné, etc., parmi ce toutevoies que ycellui Pierre Baron sera et
demourra deux mois prisonnier ès prisons dont il s'est parti, où ailleurs où il
appartendra. Si donnons en mandement à noz amez et feaulx conseilliers les genz de
nostre Parlement, au prevost de Paris, au bailli de Touraine, des Exemptions d'Anjou et
de Poitou, et à touz noz autres justiciers et officiers, etc. Donné à Paris, le XXVe
jour de septembre l'an de grace mil CCC IIIIXX et douze, et de nostre regne le
XIIIe.
Es requestes par vous tenues, du commandement du roy, les evesques de Langres et de
Noyon3 le chancellier [p. 87] de Bourgogne4, le sire de Norry5 et maistre Oudart de Molins6 presens. Dominique. — Voisines.