[p. 92]

MDLXXV

Rémission obtenue par André Trollet et Jean Bureau, laboureurs, qui, pour secourir plusieurs de leurs parents et compagnons, attaqués par Guillaume Boivineau (alias Bonneau et ses deux fils), avaient frappé à coup de fourche ledit Guillaume, qui était mort de ses blessures.

  • B AN JJ. 201, n° 94, fol. 76 v°
  • a P. Guérin, Archives historiques du Poitou, 41, p. 92-94
D'après a.

Loys, par la grace de Dieu, etc. Savoir faisons, etc. de André Trollet et Jehan Bureau, pouvres gens de labour, demorans ou pays de Poictou, avoir receu … contenant que Jehan Boivineau, Tiphaine Boivinelle, femme Jehan Martin, Pierre Martin son filz, Mathurin Massay et autres sont héritiers, propriétaires et possesseurs, et à eulx compecte et appartient une piece de terre par quatriesmes, assise près le village des Barillières en la paroisse Saint-André, comme héritiers de feu Guillaume Boivineau, leur grant père, et de ce ont joy par bien longtemps au veu et sceu de tous ceulx qui l’ont voullu veoir et savoir. Or est il que le venredi d’après la Feste Dieu, les dessusdiz et suplians oyrent dire que ung nommé Guillaume Boivineau, leur oncle, se ventoit d’aller lever et cueillir le blé ou orge, qui en icelle pièce de terre avoit esté semé, et avoit entencion de faire perdre aux dessusdiz ce qui justement leur appartenoit. Et ce venu à leur congnoissance, parlèrent ensemble et dirent que mieulx-vauldroit qu’ilz allassent cuillir chascun sa part dudit orge, que le laissassent perdre et emporter aux autres, et que, s’ilz y alloient durant que ledit Guillaume y seroit, il ne se pouroit faire qu’il n’y eut noyse, pour ce qu’il estoit homme noisif. Et ce dit jour, chascun d’eulx print sa faucillie, une fourche de fer et troys ou quatre de boys pour charger les gerbes, menèrent leur charroy, prindrent paulx, bastons et autres choses à eux servans pour mener ledit orge, et se mirent à chemin ; et près de ladite pièce [p. 93] de terre rencontrèrent ledit Guillaume, leur oncle, qui estoit fort despité contre eulx, et leur dit telz moz : « Où allez-vous, gens d’armes », et lesdiz suplians lui respondirent : « Nous ne sommes point gens d’armes, mais sommes mestiviers, qui allons cuillir nostre orge qui est icy près. » Lequel ne leur dist mot et s’en alla, tout anflé contre eulx, droit à sa maison. Et quant ilz furent en ladite pièce de terre, survint Honnoré Bonneau1, filz dudit Guillaume, lequel Honnoré avoit une arbaleste d’assier bandée, ung trait dessus ferré et d’autres à sa sainture, avecques ung grant cousteau, et disant et jurant la mort Dieu plusieurs foys qu’il mettroit les diz suplians hors du champt et que, s’ilz ne s’en sortoyent, qu’il en turoit ung. Et quant lesdiz suplians virent ledit Honnoré ainsi eschaufé contre eulx, creigniant le trait et pour eviter plus grant noise, saillirent hors du champt criant au meurtre, fors ledit Jehan Bonneau, lequel demoura seul dedans le champ avecques ledit Honnoré qui tousjours le poursuivoit, ladite arbaleste bandée ; et quant ledit Jehan Bonneau se vit seul et que les dessusdiz s’en estoient sortiz dudit champt et qu’il estoit en dangier de mort, se escrya à l’ayde, en appellant les diz suplians, lesquelz quant ilz le oyrent ainsi cryer, retornèrent oudit champt, se mirent entour ledit Honnoré pour lui oster son arbaleste et obvier qu’il ne tuast ne blessast aucun d’eulx, en le priant doulcement qu’il voulsit laisser ladicte arbaleste, dont il ne voult riens faire, et perseverant tous jours de pis en piz, juroit et regnioit Dieu qu’il en turoit ung, et eurent plusieurs parolles, tellement que les dessusdiz lui donnèrent deuz ou troys copz de forche et lui ostèrent son arbaleste et sondit grant cousteau. Auquel debat survint ledit Guillaume Bruneau (sic), leur oncle, et Jehan Bruneau, son filz, qui portoit à [p. 94] son col ung baston, appellé ung vollant, lequel ledit Guillaume print en sa main, en regniant Dieu qu’il en turoit ung, et à tour de bras en donna sur la teste de Jehan Martin, l’un desdiz suplians, tellement qu’il se enclina, mes il ne cheut point à terre, mais fut fort blessé jusques à grant effusion de sanc. Et ce voyant lesdiz suplians leur parent et compagnion, et que ledit Guillaume se efforsoit frapper ledit Andreu l’un desdiz compaignons, et supliant, et ledit Guillaume lui voulloit courir sus oultrageusement, lui donna ung copt d’une forche de fer qu’il tenoit, duquel lieu n’est recors, sans lui faire aucune blessure ne mutillacion, duquel copt ne se doult, mais illec vint Mathurin Massay avec une forche de boys qui en donna audit Guillaume ung autre copt entre les espaules et la teste, et ledit Jehan Bonneau, son nepveu, ung copt d’ung pal qu’il avoit par la teste, duquel copt il cheut à terre ; et puis s’en retournèrent audit champt et illec bien toust après oyrent dire que ledit Guillaume Bonneau au moyen desdiz copz estoit allé de vie à trespassement. A l’occasion de ce, lesdiz supplians se sont absentez du pays, etc., humblement requerant, etc., noz grace et miséricorde. Pourquoy nous, ces choses considérées, etc. ausdiz supplians avons quicté, remis et pardonné, etc., avecques toute peine, etc. Si donnons en mandement, par ces dictes presentes, au seneschal de Poictou, etc., que de noz presens grace, quictance, etc., les diz supplians facent, seuffrent et laissent joïr, etc. Donné à Tours, ou moys d’aoust, l’an de grace mil iiii lxxvi, et de nostre règne le xvie, soubz nostre seel ordonné en l’absence du grant.

Ainsi signé : Par le Conseil. Ponchier. — Visa. Contentor. J. Duban.


1 Sic. Le nom Boivineau est remplacé, dans la seconde partie de l’acte, par Bonneau et même par Bruneau.