[p. 486]

MDCCIII

Création de quatre foires l’an et d’un marché le vendredi de chaque semaine à Nieuil-l’Espoir, en faveur de l’abbaye de la Sainte-Trinité de Poitiers.

  • B AN JJ. 209, n° 89, fol. 53
  • a P. Guérin, Archives historiques du Poitou, 41, p. 486-488
D'après a.

Loys, etc. Savoir faisons à tous, presens et avenir, Nous avoir receue l’umble supplicacion de noz chères et bien amées les religieuses, abbesse1 et convent de la Saincte Trinité de Poictiers, contenant qu’elles sont dames de la terre et seigneurie de Nyeil l’Espoir, lequel lieu de Nyeil l’Espoir est assis et situé en païs bon et fertile et y affluent et frequentent et ès environs grant quantité de marchans en plusieurs saisons de l’année, et en auroit encores plus, s’ilz avoient lieu et temps determinez pour eulx assembler et communicquer, en Nous requerant humblement que attendu ce que dit est et que ledit lieu de Nyeil l’Espoir est en lieu moult propre et convenable pour l’assemblée desdiz marchans, et y tenir quatre foires l’année à certains jours et marché à ung jour de la sepmaine, il Nous plaise sur ce creer et establir audit lieu de Nyeil l’Espoir quatre foires par chacun an et ung marché la sepmaine, c’est assavoir la premiere desdictes foires le jour et feste sainct Gervais, la seconde le lendemain de la feste de la Nativité [p. 487] Nostre Dame en septembre, la tierce le jour et feste sainct Clemens et la quarte le jour et feste sainct Mathias en fevrier et ledit marché au jour de vendredi par chacune sepmaine et sur ce nostre grace leur impartir. Pourquoy Nous, ces choses considerées, desirans le cours de marchandise estre multiplié en nostre royaume, et afin d’augmenter les droiz et dommaines desdiz supplians, à ce qu’elles aient mieulx de quoy vivre, pour faire dire et entretenir le service divin deu et accoustumé estre fait oudit monastère qui est, comme dit est, fondé de la Saincte Trinité, et en faveur de nostre amé et feal conseiller et chambellan et grant mareschal de noz logis Jehan de Blanchefort2, chevalier, maire de Bordeaulx, frere de ladicte abbesse, qui sur ce Nous a pour lesdiz supplians supplié et requis ; pour ces causes et autres à ce Nous mouvans, avons, de nostre certaine science, grace especial, plaine puissance et auctorité royal, creé et estably et par ces presentes creons et establissons audit lieu de Nyeil l’Espoir quatre foires par chacun an et ung marché toutes les sepmaines, pour y estre tenues et excercées, c’est assavoir la premiere foire ledit jour et feste sainct Gervais, la seconde le lendemain de la feste de la Nativité Nostre Dame en septembre, la tierce le lendemain du jour et feste sainct Clemens et la quarte le jour et feste sainct Mathias en fevrier, et ledit marché au jour de vendredi par chacune sepmaine ; ausquelz jour l’on pourra vendre et achapter toutes manieres de marchandises licites et honnestes, comme l’on fait ès autres foires de nostre dit royaume. Sur lesquelles denrées et marchandises Nous donnons povoir et auctorité par cesdictes presentes ausdictes supplians qu’elles puissent et leur loise joir et user [p. 488] de toutes manieres de coustumes, poix, aulnages, privilleges, franchises, libertez, prerogatives et preeminences, ainsi et par la forme et maniere que ont acoustumé de joir et user les seigneurs dudit païs de Poictou, ouquel est assis ledit lieu de Nyeil, ayans foires et marchez en leurs terres et seigneuries. Si donnons en mandement par ces mesmes presentes au seneschal de Poictou et à tous noz autres justiciers, etc., que de noz presens grace, creacion et establissement, etc.3. Et afin, etc., Sauf etc. Donné à Thouars, ou mois de janvier l’an de grace mil cccc. quatre vings et ung, et de nostre règne la vingt et ungiesme.

Ainsi signé : Par le roy, les evesques d’Alby et de Lombez4 et autres presens, Amys. — Visa. Contentor. Texier.


1 Louise de Blanchefort, sœur, ainsi qu’on le verra dans la suite du présent acte, de Jean de Blanchefort, conseiller du roi et maire de Bordeaux, fut abbesse de la Trinité de 1470 à 1484. (Gall. Christ., t. II, col. 1308.) [L.C.]

2 Sur Jean de Blanchefort, conseiller et chambellan de Louis XI, maire de Bordeaux, maréchal des logis de France, employé par le roi à plusieurs missions diplomatiques, v. le P. Anselme, Hist. généal. de la Maison de France, t. IV, p. 289, et Vaesen, Lettres de Louis XI, t. IV, p. 192, note, et ci-dessus, p. 276, note. [L.C.]

3 La fin de ces lettres est exactement semblable à celle des précédentes.

4 Sur Louis d’Amboise, évêque d’Albi, et Jean de Villiers, évêque de Lombez, voir ci-dessus, p. 486, note [L.C.]