[p. 429]

MDCLXXXI

Rémission accordée à Benoît Roy, archer de retenue de Lussais, prisonnier du prévôt des maréchaux, pour avoir violé, avec d’autres archers ses compagnons, la fille d’un habitant de Vaussais, chez qui ils étaient logés, à condition d’aller en pèlerinage à Notre-Dame du Puy.

  • B AN JJ. 208, n° 37, fol. 20, v°
  • a P. Guérin, Archives historiques du Poitou, 41, p. 429-431
D'après a.

Loys, etc. Savoir faisons à tous, presens et avenir, nous avoir receu l’umble supplicacion des parens et amis charnelz de Benoist Roy, nagueres archier de retenue pour la parroisse de Lussay en Poictou, à present detenu prisonnier entre les mains du prevost des mareschaulx de France, contenant que, ung mois a ou environ, ledit Benoist Roy et autres archiers de retenue, ses compaignons, logerent en la parroisse de Vausay ; lequel Benoist estant en son logeis, vindrent devers lui Pierre Buret, Jehan Douzil et autres en leur compaignie, auquel ils disdrent que s’il voulloit aller avecques eulx, qu’ilz auroient et emmeneroient la fille de leur hoste, qui estoit fille de joye et avoit longuement demouré avecques ung prebstre. A quoy ledit Benoist Roy et autres ses compaignons se consentirent et allerent, avec leurs espées, en la maison du père de ladicte fille, où elle estoit ; et quant ilz furent à ladite maison, prindrent ladicte fille nommée Olive et par force la misdrent et gectèrent hors d’icelle maison, jaçoit ce que ladicte Olive criast et plourast et fist de grans resistances et que son [père1] s’efforçast d’empescher qu’ilz ne la menassent ; et oultre le gré et voulonté d’elle et de sondit père, l’emmenèrent au lieu de Lorigné, et en l’emmenant lui donnèrent de grans menasses ; et eurent lesdiz compaignons la compaignie de ladicte fille. Et après [p. 430] voyanlt (sic)2 ledit Benoist Roy, en un buisson, assez près de l’ostel du père, s’efforça et essaya par deux foiz avoir sa compaignie, mais il ne peut. Et depuis ledit Benoist Roy et sesdiz compaignons gardèrent ladicte fille ung jour ou deux et après, par le commandement de leur cappitaine, la rendirent à son père et à ses amys. A l’occasion duquel cas ledit Benoist Roy et aucuns de ses compaignons ont été prins et constituez prisonniers ès mains dudit prevost des mareschaulx ou de son lieutenant, par la justice duquel l’un desdiz compaignons a esté puis naguères executé. Et [est] en voye ledit Benoist Roy d’estre pareillement exécuté ou de finir de brief miserablement ses jour, se noz grace et misericorde ne lui estoient sur ce imparties, en nous humblement requerans lesdiz parens et amis que, attendu que ledit Benoist Roy a en tous autres cas esté tousjours de bonne vie et honneste conversacion, sans avoir esté actaint ne convaincu d’autre villain cas, blasme ou reprouche, et que ladicte fille avoit esté autresfoiz avecques autres et en leur compaignie comme fille de joye, et est ledit Roy jeune homme à marier, lequel une jeune fille demande à avoir en mariage, ce qu’il a entencion de faire et la prandre en mariage il nous plaise impartir nosdictes grace et miséricorde audit Benoist Roy. Pour quoy nous, etc., voulans, etc., audit suppliant avons quicté, remis et pardonné le fait et cas dessus dit, avecques toute peine, etc., et l’avons restitué, etc., satisfacion, etc. Et sur ce imposons, etc. Parmy ce toutes voyes que ledit Benoist Roy yra en voyaige à Nostre Dame du Puy en Auvergne, rendre graces à Dieu et à Nostre Dame de la grâce et miséricorde qui lui a esté faicte et y offrira ung cierge d’une livre de cire ; et apportera certifficacion du curé ou vicaire du lieu du voyage par lui fait et accomply. Si donnons en mandement au seneschal de Poictou, bailli de [p. 431] Touraine, prevost des mareschaulx et à tous noz autres, etc. Et afin, etc. Sauf, etc. Donné au Plessys du Parc lez Tours, ou mois de mars l’an de grace mil cccc. quatre vings et de nostre règne le vingtiesme.

Ainsi signé : Par le roy, l’evesque d’Alby, maistre Jehan de la Vaquerie, président3, et autres presens. Duban. — Visa. Contentor. Texier.


1 Mot suppléé.

2 Quelques mots omis.

3 Ces personnages ont été identifiés [L.C.]