MDCVI

Loys, par la grace de Dieu roy de France. Savoir faisons à tous, presens et advenir, comme les lieu, place et bourg de L’Ermenault en Poictou appartenant à nostre cher et feal cousin et conseiller l’evesque de Maillesais1, soit assis en païs fertil et de grant passaige et fort frequenté de marchans [p. 198] passans et rappassans chacun jour par iceulx et qui audit lieu y ait eu anciennement marché le mardi de chacune sepmaine et halle pour le tenir, et jusque puis certain temps que ladicte halle est tombée en ruyne et le marché discontinu à cause des guerres et divisions qui ont eu cours en nostre royaulme ; et soit ainsi que nostredit cousin nous ait remonstré, que, pour la decoracion et melioracion dudit bourg et lieu, il feist voulentiers doresenavant tenir et continuer audit jour de mardi de chacune sepmaine ledit marché en icellui lieu et bourg de l’Ermenault et aussi foire à quatre jours de chacune année, l’une le jour saint Blaise, tiers de fevrier, l’autre le jour saint Jehan Porte latin, sixiesme [p. 199] jour de may, l’autre le jour des octaves de l’Assumption de Nostre Dame, xxii^e jour d’aoust, et la quarte le ix^e jour de decembre, lendemain de la feste Nostre Dame oudit moys, esquelz jour[s] n’a aucunes foires à troys lieues à la ronde dudit lieu de L’Ermenault, s’il nous plaisoit lui octroyer lesdictes foires et continuacion dudit marché. Pour quoy nous, les choses [dessus dictes] considerées et mesmement que audit bourg y a d’ancienneté eu marché audit jour, desirans singulierement l’entrecours de marchandise en nostredit royaulme et inclinans en ceste partie à la requeste de nostredit cousin et autres, et pour autres causes à ce nous mouvans, avons à icellui nostredit cousin, de nostre grace especial, plaine puissance et auctorité royal, octroyé et octroyons par cesdictes presentes que audit lieu de l’Ermenault y ait et soient tenuz doresenavant et à tousjours marché le jour du mardi de chacune sepmaine, ainsi qu’il a esté par cy devant, et lesdictes foires aux quatre jours de l’an dessus declairez, sauf que, se lesdictes foires advenoient au jour du dimanche, elles seront pour celles foiz renvoiez au lendemain ; et icelles foires avons audit lieu, ensemble ledit marché, de nouvel, en tant que mestier seroit, creez, ordonnez, instituez et establiz, creons, ordonnons, instituons et establissons, par cesdictes presentes. Si donnons en mandement, par ces mesmes presentes, au seneschal de Poictou ou à son lieutenant et à tous noz autres justiciers, où à leurs lieuxtenans, presens et advenir, et à chacun d’eulx sur ce requis et comme à luy appartiendra, que en faisant, souffrant et laissant nostredit cousin et ces predecesseurs2 joir et user plainement et paisiblement de nostredit octroy, creacion et establissement, ilz facent publier lesdictes foires et marché par tout où il appartiendra, et icelles tenir et entretenir doresenavant comme les autres foires et marchez [p. 200] du pays d’environ, en contraignant à ce faire et souffrir tous ceulx qui pour ce seront à contraindre, par toutes voyes et manieres deues et raisonnables, et sans faire, mettre ou donner, ne souffrir estre fait, mis ou donné à nostredit cousin ne sesdiz successeurs aucun empeschement au contraire, ores ne pour le temps advenir, en quelque maniere que ce soit ; lequel, se fait, mis ou donné leur avoit esté ou estoit, mettent ou facent mettre sans delay à plaine delivrance. Pourveu toutes voyes que, comme dit est, n’y ait ausdiz jours aucunes foires à troys lieues à la ronde dudit lieu de l’Ermenault, ausquelles puissent prejudicier. Et affin que ce soit chose ferme et estable à toujours, nous avons fait mettre nostre seel à cesdictes presentes. Sauf en autres choses nostre droit et l’autruy en toutes. Donné au Plessis du Parc, ou moys de decembre, l’an de grace mil iiii^c lxxvii, et de nostre règne le xvii^e3.

Ainsi signé sur le reply : Par le roy, l’evesque d’Alby et maistre Raoul Pichon4, presens, Disome. — Visa.