[p. 547]

MDCCXXIII

Don d’un droit d’usage en la forêt de Moulière et création d’un sceau aux contrats et de tabellions, ainsi que de trois foires l’an et d’un marché chaque semaine à Beaumont, en faveur d’Abel de Brizay, écuyer d’écurie du roi, seigneur du lieu.

  • B AN JJ. 207, n° 152, fol. 73 v°
  • a P. Guérin, Archives historiques du Poitou, 41, p. 547-550
D'après a.

Loys, etc. Savoir faisons à tous presens et avenir, que nous ayans regard et consideracion aux grans, continuelz, agreables et recommandables services que nostre chier et bien amé escuier d’escuierie Abel de Brisay, seigneur de Beaumont1, nous a par cy devant faiz dès son jeune aage, fait et continue chacun jour on fait de noz guerres, alentour de nostre personne en noz plus grans et principaulx affaires et esperons que encores face le temps avenir voulans iceulx aucunement recongnoistre envers lui et eslever sesdictes terres en honneurs et preeminences, à icellui, pour ces causes et consideracions et autres à ce nous mouvans, avons octroyé et octroyons, voulons et nous plaist, de grace especial, plaine puissance et auctorité royal, par ces presentes, qu’il puisse et lui loise faire ordonner et establir audit lieu de Beaumont et seigneurie dudit lieu, en laquelle de toute ancienneté il a droit de toute justice, haulte moienne et basse et aussi y souloit avoir droit de chastellenie, seel aux contractz et tabellions pour recevoir et passer toutes manières de contractz, obligacions et autres lettres, pour en joir perpetuellement par lui et ses successeurs, [p. 548] seigneurs dudit lieu de Beaumont, ensemble, des droiz et prerogatives qui en deppendent, tout ainsi que les autres seigneurs aians seel aux contractz ont accoustumé joyr et user ; et lequel seel et tabellions nous avons creez, ordonnez et establiz, creons, ordonnons et establissons audit lieu de Beaumont. Et oultre lui avons donné et octroyé, donnons et octroyons de nostredicte grace par cesdictes presentes, pour lui et ses successeurs, seigneurs desdiz lieux de Beaumont et du lieu de Bram, droit de usaige en nostre fourest de Moulière, et voulons que lui et ses successeurs seigneurs desdiz lieux, puisent perpetuelment prandre en ladicte forest tout le bois qu’il leur sera neccessaire tant pour leur chauffage que pour bastir, construire et ediffier esdiz lieux, et duquel droit ses predecesseurs, seigneurs dudit lieu de Beaumont, ont jouy d’ancienneté, et lequel droit d’usage lui et ses successeurs tiendront de nous à foy et hommage à cause de nostre chastel de Poictiers et seront tenuz le faire à chacune muance de seigneur et vassal, et aussi à la recepte ordinaire de Poictiers paier ung esparvier, sans autre charge ou reddevance quelconque. Et pour ce que audit lieu de Beaumont frequentent et affluent chacun jour plusieurs marchans, par quoy, pour le bien et augmentacion de ladicte seigneurie et des habitans d’environ, seroit besoing et necessité establir aucunes foires et marché ; nous, ces choses considerées, desirans de plus en plus augmenter ladicte seigneurie de Beaumont en honneurs et prerogatives, avons audit lieu de Beaumont creées, ordonnées et establies, creons, ordonnons et establissons, de nostre plus ample grace et auctorité trois foires l’an et ung marché par chacune sepmaine, c’est assavoir lesdictes foires l’une le jour et feste monsieur sainct Blaise qui est le iiie jour de fevrier, la seconde le jour et feste monsieur sainct Georges, qui est le xxiiie jour de avril, et la tierce le jour et feste du glorieulx martir monsieur sainct Laurens, [p. 549] qui est le dixiesme jour d’aoust, et ledit jour de marché un jour de mardi par chacune sepmaine ; et voulons que ausdiz jours lesdiz foires et marché soient doresnavant perpetuellement tenues et que tous marchans et autres qui les frequenteront et à icelles afflueront y puissent vendre, debiter et eschanger toutes denrées et marchandises licites et honnestes et qu’ilz joyssent de telz et semblables previlleiges, franchises et libertez qu’ilz ont acoustumé joir et user ès autres foires et marchez dudit païs. Et pour icelles tenir, voulons et nous plaist que ledit Abel de Brizay puisse faire construire et eddiffier halles en tel lieu ou lieux qu’il verra ad ce estre propices et convenables. Si donnons en mandement à noz amez et feaulx gens de noz comptes et tresoriers, au seneschal de Poictou, maistre et reformateur general de noz Eaues et forest, et à tous noz autres justiciers ou à leurs lieuxtenans, presens et avenir, et à chacun d’eulx, si comme à lui appartiendra que de noz presens grace et octroy ilz facent et souffrent ledit Abel et sesdiz successeurs, seigneurs desdiz lieux, joir et user paisiblement, perpetuellement et à tousjours, sans leur faire ou mettre, ne souffrir estre fait ou mis aucun destourbier ou empeschement ; au contraire lequel se fait ou mis leur estoit, mettent ou facent mettre incontinant et sans delay à plaine delivrance et au premier estat et deu, en faisant crier et publier lesdictes foires et marché ès lieux acoustumez et ainsi qu’il est acoustumé faire en tel cas, et faisant joir les marchans qui les frequenteront de telz et semblables previlleges, franchises et libertez qu’ilz ont acoustumé joir et user ès autres foires et marchez dudit païs, pourveu toutesvoyes que ausdiz jours ne à quatre lieues à l’environ n’y ait aucunes foires et audit jour de mardi à deux lieues aucun marché, à qui lesdictes foires et marché puissent nuyre ou prejudicier. Et en rapportant ces presentes signées de nostre main ou vidimus d’icelles fait soubz seel royal et recongnoissance de nostredit [p. 550] chambellan sur ce suffisante pour une foiz tant seullement, nous voulons tous noz receveurs à qui ce pourra toucher en estre perpetuellement tenuz quictes et deschargez par nosdiz gens des comptes, sans aucune difficulté, non obstant quelzconques ordonnances, restrinctions mandemens ou deffences à ce contraires. Et afin, etc. Sauf, etc. Donné au Plesseys et du Parc les Tours, ou mois d’octobre l’an de grace mil cccc. quatre vings et deux, et de nostre règne le vingt et deuxiesme.

Ainsi signé : Loys. — Par le roy. A. Robert. — Visa. Contentor. Bernart.


1 Sur Abel de Brisay, seigneur de Beaumont, né en 1446, mort en 1503, marié à la marquise de Menou, voy. Beauchet-Filleau, Dictionnaire des familles du Poitou, nelle éd., t. I, p. 794, notice où l’octroi du droit d’usage en forêt de Moulière, qui fait l’objet d’une des dispositions du présent acte, est attribué, par erreur, à Charles VIII, qui dut seulement le confirmer. [L.C.]