[p. 439]

MDCLXXXV

Rémission obtenue par Jean Bernard, natif de l’Isle-Bouchard, détenu prisonnier à Tours comme faux saunier, s’approvisionnant à la Ferrière près Parthenay, et parce qu’il avait menacé de frapper les francs-archers qui l’avaient mis en arrestation.

  • B AN JJ. 207, n° 224, fol. 105, v°
  • a P. Guérin, Archives historiques du Poitou, 41, p. 439-440
D'après a.

Loys, etc. Savoir faisons à tous, presens et avenir, Nous avoir receue l’umble supplicacion des parens et amis charnelz de Jehan Bernard, natif de l’Isle Bouschart, à present detenu prisonnier ou chasteau de Tours, contenant que puis deux ans ença ou environ et que octroyasmes remission et abollicion à tous faulx saulniers, ledit Jehan Bernard a esté querir du sel souventesfoiz à la Ferriere près Partenay et ailleurs ou païs de Poictou, et en a amené par plusieurs et diverses foiz sur bestes chargées, lequel il a vendu et distribué à plusieurs et diverses personnes, et mesmement à Mathelin Boutemye, à Petit Jehan Goujon de Saincte Katherine de Fierbois, à Thenot Lorrain, à ung nommé Grandin d’Azay le Bruslé, à Robin d’Albin de la ville de Tours et à plusieurs autres ; partie duquel seel qu’il amenoit, aucunes foiz qu’il lui a esté par les francs archiers qui le rencontroient menant ledit sel et lui en a esté emblé par aucunes personnes, qui l’ont trouvé caché en [p. 440] plusieurs lieux où il le mectoit afin qu’il ne fust apperceu. Et à l’une des foiz que lesd. francs archers le rencontrerent menant ledit sel, iceulx vouldrent prandre ses bestes et de fait les prindrent : et quant il vit qu’il les vouloient enmener, il print ung baston, en disant que à celle heure failloit jouer à quicte et à double, et se parforça et ingera de frapper lesdiz francs archiers. A l’occasion desquelz cas ledit Jehan Benard a esté constitué prisonnier èsdictes prisons de Tours, èsquelles il a desja esté par l’espace de trois sepmaines en grant pouvreté et misere et est en voye de y finer miserablement ses jours, se noz grace et misericorde ne lui estoient sur ce imparties ; en Nous humblement requerant iceulx … Pour quoy Nous, etc., voulans, etc., audit Jehan Bernard, en l’onneur et reverance de la Passion de nostre Sauveur Jhesu Crist qui a tel jour qu’il est aujourd’uy souffrit mort et passion pour la redempcion de l’umain lignaige, avons quicté, remis et pardonné le fait et cas dessusdit avecques toute peine, etc. Et l’avons restitué, etc., satisfacion, etc. Et sur ce imposons, etc. Si donnons en mandement au bailli de Touraine et à tous, etc. Et afin, etc. Sauf, etc. Donné au Plesseys du Parc lez Tours, ou mois d’avril l’an de grace mil cccc. quatre vings, et de nostre regne le vingtiesme, avant Pasques.

Ainsi signé : Par le roy tenant ses Requestes. J. Duban. — Visa. Contentor. Texier.