[p. 433]

MDCLXXXIII

Création de trois foires par an à Vendeuvre, en faveur de l’évêque de Poitiers, seigneur temporel du lieu.

  • B AN JJ. 209, n° 101, fol. 59
  • a P. Guérin, Archives historiques du Poitou, 41, p. 433-435
D'après a.

Loys, etc. Savoir faisons à tous, presens et avenir, Nous avoir receue l’umble supplicacion de nostre amé et feal conseiller Guillaume evesque de Poictiers, seigneur temporel de Vendeuvre en Poictou, contenant que ledit1 lieu de Vendeuvre est situé et assis en bon païs et fertil, assez près de bonnes villes et villages, et y passent et frequantent plusieurs marchans et autres gens allans et venans d’un [p. 434] païs en autre, portans marchandises et autrement. Et auquel lieu de Vendeuvre, pour le bien, utilité, prouffit et augmentacion d’icellui et païs d’environ, seroit besoing à nostredit conseiller suppliant avoir trois foires l’an, c’est assavoir la premiere au jour et feste sainct Avantin ou mois de jung (sic), la seconde au jour et feste Ste Luce ou mois de decembre et la tierce au jour et feste sainct Mathieu ou mois de …2, pour y estre tennues et continuées d’ores en avant et à tousjours, se nostre plaisir estoit icelles foires y establir et ordonner, ainsi qu’il Nous a fait dire et remonstrer, en Nous humblement requerant que, actendu ce que dit est et que à quatre lieues à la ronde près dudit lieu de Vendeuvre n’a ville ne autre lieu où il y ait foires ausd. jours et festes, il Nous plaise sur ce lui impartir nostre grace. Pour quoy Nous, les choses dessusd. considerées, inclinans liberallement à la requeste de nostredit conseiller suppliant, et pour autres causes et consideracions à ce Nous mouvans, avons creé, ordonné et estably et par la teneur de ces presentes, de grace especial, plaine puissance et auctorité, creons, ordonnons et establissons audit lieu de Vendeuvre lesd. trois foires, c’est assavoir l’une audit jour et feste St Avantin en jung, la seconde audit jour et feste saincte Luce en décembre et la tierce audit jour et feste sainct Mathieu ou moys de …, pour y estre tenues, continuées et entretenues d’ores en avant et à tousjours perpetuellement, pourveu tesvoyes (sic) que ausd. jours et festes n’ait aucunes foires à quatre lieues à la ronde près dudit lieu de Vendeuvre et que lesd. foires ne soient préjudicables (sic) à Nous et à la chose publicque, ne que noz droiz et devoirs n’en soient aucunement diminuez. Si donnons en mandement par ces mesmes presentes au seneschal de [p. 435] Poictou ou à son lieutenant, etc.3 Donné au Plessis du Parc lez Tours, ou moys de mars l’an de grace mil cccc quatre vings, et de notre regne le vingtiesme.

Ainsi signé : Par le roy, l’evesque d’Alby, le conte de Castres, maistre Jehan de la Vacquerie president, et autres presens, J. Duban. — Visa. Contentor. F. Texier.


1 Ledit, ledict sont restitués autant que possible ; si non led.

2 La date a été laissée en blanc. La Saint-Matthieu se fête le 21 septembre.

3 La suite du texte est la reproduction exacte des quinze dernières lignes des lettres qui précèdent immédiatement (création d’une foire à Dissay).