MDCXXXVII

Loys, par la grace de Dieu roy de France. Savoir faisons à tous, presens et avenir, nous avoir receue l’umble supplicacion des parens et amis charnelz de Guillaume Delacroix, dit l’Arbalestier, aagé de quarante cinq à cinquante ans ou environ, demourant en la ville de Chasteaulerault, contenant que le derrenier jour d’avril derrenièrement passé, ledit Guillaume Delacroix se transporta en la maison du curé de Chenevelles, en la viconté de Chasteaulerault, avec ung nommé Michau Chevalier, dit Pellegret, hostellier dudit lieu, lequel Pellegret avoit requis, le jour précedent, [p. 287] ledit Guillaume qu’il lui pleust aler avec lui audit lieu de Chenevelles, pour ce qu’il portoit de l’argent au curé dudit lieu. Et ainsi comme ledit Pellegret comptoit l’argent audit curé, ledit Guillaume Delacroix s’en sortit et alla hors de ladicte maison et s’en alla en l’ostel d’un nommé Pierre Ledoulx, hostellier de Chenevelles, et là fut par l’espace d’un quart d’eure, et tantost après s’en retourna vers la porte dudit curé, et en s’en retournant, encontra deux jeunes paiges qui lui demandèrent qui estoit logé chez ledit curé ; lequel Guillaume respondit que Monsieur de la Bessière y devoit loger, et l’un desdiz paiges lui demanda : « Esse pas vous qui avez nom Guillaume l’Arbalestier ? » Ausquelz ledit Guillaume : « Ouy, à vostre commandement. » Et incontinant après arrivèrent deux hommes à cheval, desquelz l’un se nommoit Hardy de Montours1, qui demanderent audit [p. 288] Guillaume : « Esse pas toy qui es sergent qui garde la porte du curé ? « Ausquelz respondit ledit Guillaume que nenny et qu’il n’estoit point sergent, et qui le demandassent au paige qui le congnoissoit bien. Et adonc dist ledit Hardy de Montours qu’il avoit menty et lui demanda à qui il estoit, et ledit Guillaume respondit qu’il estoit à Mons^r de Calabre2. Et incontinant lui dit ledit Hardy que non estoit, et dessendit de dessus son cheval, et sans mot dire bailla ung soufflet audit Guillaume, lequel n’en fit compte et n’en dit mot. Et ledit Hardy, non content de ce, lui donna de taille de son espée sur la teste tant qu’il peut, tellement qu’il fit cheoir le chapeau dudit Guillaume à terre ; et après ce fait, ledit Hardy encores derechief lui bailla ung autre cop, duquel, si ledit Guillaume n’eust mis son bras sur sa [p. 289] teste ledit Hardy l’eust griefvement blecé, et lui coppa dudit cop, la manche de sa robe et prepoint et le bleça ung peu au braz, en renoyant Dieu qu’il tueroit tout roidde ledit Guillaume. Et ce voyant icellui Guillaume, fort troublé et esmeu de ainsi estre persécuté, doubtant la fureur dudit Hardy, en soy deffendant, tira une bistoire de dessoubz sa robe et donna audit Hardy ung cop d’estoc parmy la penillière et s’en fouyt, et ledit Hardy après, son espée nue. Lequel Hardy depuis, gisant au lit pour ledit cop, dist qu’il mouroit par sa faulte et qu’il avoit tort d’avoir frappé ledit Guillaume, et ne vouloit qu’il en eust aucun mal, priant à tous ses amys qu’ilz n’en fissent aucun desplaisir au curé de Chenevelles ne autres. Et au moien duquel cop, par faulte de bon gouvernement ou autrement, ledit Hardy de Montours, deux ou trois jours après, est allé de vie à trespassement. Pour lequel cas ainsi avenu ledit Guillaume Delacroix3 est à present détenu ès prisons de Chasteaulerault en grant misere et povreté et dangier de miserablement finer ses jours, se noz grace et misericorde ne lui estoit sur ce impartiz ; humblement requerant, etc. Pour quoy nous, etc. Si donnons en mandement à nostre seneschal de Poictou ou à son lieutenant et à tous noz autres justiciers, etc. Donné à Nemours, ou moys de may, l’an de grace mil cccc. soixante dix neuf, et de nostre règne le dix huitiesme.

Ainsi signé : Par le roy, à la relacion du Conseil. Villebresme. Visa. Contentor. De Moulins. — Registrata.