MDCLXIV

Loys, etc. Savoir faisons à tous, presens et avenir, nous avoir receue l’umble supplicacion de Eustasses des Granges1, clerc, aagé de trente ans ou environ, contenant [p. 365] que, dix ans a ou environ et ung jour entre les autres feu Jehan Mallon, seigneur de la Lyonerie et vassal du père dudit suppliant, qui par plusieurs foiz avoit injurié et oultragé icelui suppliant et ses père et mère et leurs subgetz, ainsi que ledit suppliant venoit d’aucuns ses affaires et lui [p. 366] estant près de la maison dudit Jehan Mallon, sans lui meffaire ne mesdire, icellui Jehan Mallon en continuant de mal en pis, vint illec au devant d’icellui suppliant garni et embastonné d’une longue javeline et d’une espée et de fait assaillit icellui suppliant en soy efforçant de le frapper de ladicte [p. 367] javeline parmi le corps et le cuidant tuer et occirre ; mais ledit suppliant y obvia tellement qu’il ne fut point blecié dudit coup, et voyant la fureur dudit Jehan Mallon et tout esmeu et eschauffé de ce que icelluy Jehan Mallon l’avoit ainsi voulu oultrager, tuer et murtrir de ladicte javeline et afin de obvier qui ne le tuast et occist, tira son espée qu’il avoit avecques lui et lui en bailla certains [p. 368] coups de chaude colle et en son corps deffendant, et en ce faisant couppa ung bras à la femme dudit Jehan Mallon qui estoit entre deux et bleça icellui Jehan Mallon, son mary, tellement que depuis par sa coulpe et faulte de bon gouvernement ou autrement, il est, comme l’en dit, allé de vie à trespas. A l’occasion duquel cas, ledit suppliant, doubtant rigueur de justice, dès lors se absenta du païs et de nostre royaume et s’en alla à Saint-Jacques, à Romme et ailleurs, et depuis a tousjours esté absent d’icellui pays et de nostredit royaume, et n’y oseroit jamais retourner converser ne repairer, se noz grace et misericorde ne lui estoient sur ce imparties, si comme il dit, en nous humblement requerant que, attendu ce que dit est et mesmement que ledit Jehan Mallon a esté agresseur et non ledit suppliant, et est ledit cas advenu de chaude colle et en son corps deffendant, comme dit est, icellui suppliant qui est jeune clerc à marier et gentilhomme, ne fut plus jamais actainct, convaincu ne condampné d’aucun autre vilain cas, blasme ou reprouche, et aussi qu’il a sur ce finé et composé à partie et fait satisfacion, et ne reste plus que l’interest de justice, il nous plaise lui impartir nosdictes graces et misericorde. Pour quoy nous, etc., voulans, etc., audit suppliant ou cas dessus dit avons quicté, remis et pardonné, et par la teneur, etc., quictons, remettons et pardonnons le fait et cas dessusdit, avec toute peine, etc. Et l’avons restitué, etc., en mettant au neant, etc. Et sur ce imposons, etc. Si donnons en mandement, etc., au seneschal du Poictou et à tous, etc., que de noz presens grace, etc., ilz facent, etc. Sauf, etc. Donné à Tours, ou mois d’octobre l’an de grace mil cccc. quatre vingts, et de nostre règne le vingtiesme.

Ainsi signé : Par le roy, à la relacion du Conseil. Chambon. — Visa. Contentor. Texier.